പയ്യന്നൂർ ഒന്നര വയസുകാരന്റെ മരണം; അനസ്തേഷ്യ ഡോക്ടർ തലശ്ശേരി കോടതിയിൽ മുൻകൂർ ജാമ്യാപേക്ഷ നൽകി

കണ്ണൂർ:പയ്യന്നൂർ എരത്തെ ഒന്നര വയസുകാരൻ ദേവാൻഷ് ശൗര്യയുടെ മരണവുമായി ബന്ധപ്പെട്ട വിവാദത്തിനിടെ, കേസിൽ ഉൾപ്പെട്ട അനസ്തേഷ്യ ഡോക്ടർ തലശ്ശേരി ജില്ലാ കോടതിയിൽ മുൻകൂർ ജാമ്യാപേക്ഷ നൽകി.

പയ്യന്നൂർ ഏഴോം കൊട്ടില നരിക്കോട്ടെ കൊയിലേരിയൻ വീട്ടിലെ ഡോ. അഞ്ജലി പൊതുവാൾ ആണ് മുൻകൂർ ജാമ്യം തേടി കോടതിയെ സമീപിച്ചത്. പയ്യന്നൂർ ബേബി മെമ്മോറിയൽ ആശുപത്രിയിലെ അനസ്തേഷ്യ വിഭാഗത്തിലെ ഡോക്ടറാണ് ഇവർ.

കേസുമായി ബന്ധപ്പെട്ട് അറസ്റ്റ് ഭീഷണിയുള്ളതിനാലാണ് മുൻകൂർ ജാമ്യാപേക്ഷ നൽകിയതെന്ന് അപേക്ഷയിൽ പറയുന്നു. ഡോക്ടറുടെ മുൻകൂർ ജാമ്യാപേക്ഷയിൽ ഈ മാസം 21-ന് തലശ്ശേരി ജില്ലാ കോടതി വാദം കേൾക്കും. അതേ ദിവസം തന്നെ പോലീസ് റിപ്പോർട്ടും കോടതി പരിഗണിക്കും.

പയ്യന്നൂർ എരത്തെ സ്വദേശിയായ ഒന്നര വയസുകാരൻ ദേവാൻഷ് ശൗര്യ കഴിഞ്ഞ ദിവസം പയ്യന്നൂർ ബേബി മെമ്മോറിയൽ ആശുപത്രിയിൽ ചികിത്സയിലിരിക്കെയാണ് മരിച്ചത്. കുട്ടിയുടെ മരണത്തിൽ അനസ്തേഷ്യ നൽകുന്നതിൽ വീഴ്ച സംഭവിച്ചുവെന്നാണ് ബന്ധുക്കളുടെ ആരോപണം.

ഇതേ തുടർന്ന് പയ്യന്നൂർ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിരുന്നു. സംഭവത്തിൽ വിശദമായ പോസ്റ്റ്മോർട്ടം റിപ്പോർട്ടും മെഡിക്കൽ വിദഗ്ധരുടെ അഭിപ്രായവും പോലീസ് ശേഖരിക്കുന്നുണ്ട്.

Also read: ലഹരിക്കെതിരെ 'ഓപ്പറേഷൻ തൂഫാൻ': ജൂലൈ 18ന് ശ്രീകണ്ഠപുരത്ത് 4000 പേർ അണിനിരക്കുന്ന മഹാറാലി

കേസിന്റെ ഗൗരവം കണക്കിലെടുത്ത് ആരോഗ്യ വകുപ്പും ആശുപത്രി അധികൃതരും സംഭവത്തെക്കുറിച്ച് ആഭ്യന്തര അന്വേഷണം നടത്തിവരികയാണ്. 

Content Highlight: Payyanur Toddler Death Case: Anesthesia Doctor Files Anticipatory Bail in Thalassery Court

#Payyanur News #Baby Memorial Hospital #Doctor Arrest #Thalassery Court